बाढीमा बेपत्ताका परिवारलाई दुई महिनापछि राहत

खोटाङ, भदौ २४ 

 खोटाङमा बाढीमा बेपत्ताका परिवारले दुई महिनापछि राहत पाएका छन् । गएको असार १९ गते राति तावा खोलामा आएको बाढीमा बेपत्ता बनेका मात्तिम–५ की ४० वर्षकी परिमाया राई र उनकी छोरी १२ वर्षीय समिता राईको परिवारले जिल्ला दैवीप्रकोप उद्धार समितिबाट राहत पाएका हुन् ।

बेपत्तालाई सकुशल भेट्ने सम्भावना टरेको र ज्यान गएको निश्चित गरेपछि  परिवारलाई एक लाख राहत र ४० हजार किरिया खर्च प्रदान गरिएको समितिका संयोजक एवं प्रमुख जिल्ला अधिकारी गोबिन्द सापकोटाले बताउनुभयो ।

तावा खोलाको किनारमा रहेको नाम्खा दोभानस्थित खेतमा रोपाई गर्न गएका आमाछोरी परिमाया र समितालाई अस्थायी कटेरामा बास बसेकोबेला बाढीले बगाएको थियो ।