दुई नयाँ आइफोन, नयाँ विशेषता...............

भदौ २४ – एप्पलले मंगलबार राती अमेरिकाको सन फ्रान्सिस्कोमा दुईवटा नयाँ आईफोन सार्वजनिक गरेको छ । एप्पलले आइफोन सिक्स एस र सिक्स एस प्लस एकसाथ सार्वजनिक गरेको हो । एप्पलको नयाँ आइफोको विश्वभरका प्रयोगकर्ताले उत्सुकताका साथ प्रतिक्षा गरेका थिए । एप्पलले सार्वजनिक गरेको दुई नयाँ आइफोनका विशेषता के के छन् त ?

डिस्प्ले

आइफोन सिक्स एसको डिस्प्ले चार दशमलव सात इन्च तथा सिक्स एस प्लसको डिस्प्ले पाँच दशमलव पाँच इन्चको छ । दुवै नयाँ आइफोनमा थ्री डी टच फिचर छ । जसले स्क्रिन कतिको जोडले दबाइको छ भन्ने थाहा हुन्छ । थ्री डी टचको प्रयोग गरेर आइफाने प्रयोगकर्ता एक एपबाट अर्को एपमा सजिलै जान सक्छन् । यसको माध्यमबाट आइफोनका एप चलाउन थप सजिलो र छिटो हुने एप्पलले जनाएको छ ।

क्यामरा

आइफोन सिक्स एस र आइफोन सिक्स एस प्लसमा १२ मेगापिक्सलको क्यामरा छ । यस्तै दुवै आइफोनमा पाँच मेगापिक्सलको फ्रन्ट क्यामरा छ । दुवै आइफोनले स्तरिय भिडियो रेकर्ड गर्न सक्छन् । नयाँ आइफोनले फोर के भिडियो रेकर्ड गर्ने छन् । अर्थात आइफोन सिक्स एस र सिक्स एस प्लसबाट 3840x2160 पिक्सल क्षमताको लाइभ तस्बिर सहितको भिडियो रेकर्ड गर्ने छन् । दुई नयाँ आइफोन अहिलेसम्मकै चलाउन छिटो र सजिलो आइफोन रहेको एप्पलले दाबी गरेको छ । एप्पलले यसपटक दुवै आइफोन सिल्भर, गोल्ड, स्पेस ग्रे र रोज गोल्ड रंगमा बजारमा ल्याएको छ ।

मूल्य

एप्पलले दुवै आइफोन तीन भिन्दाभिन्दै स्टोरेज क्षमताका सहितको ल्याएको छ । १६ जिबी, ३२ जिबी र ६४ जिबीको स्टोरेज क्षमता नयाँ आइफोनमा छन् । १६ जिबीको आइफोन सिक्स एसको मूल्य ६ सय ४९ अमेरिकी डलर, ३२ जिबीको ७ सय ४९ अमेरिकी डलर र ६४ जिबीको ८ सय ४९ अमेरिकी डलर पर्नेछ । १६ जिबीको आइफोन सिक्स एस प्लसको मूल्य ७ सय ४९ अमेरिकी डलर, ३२ जिबीको ८ सय ४९ अमेरिकी डलर र ६४ जिबीको ९ सय ४९ अमेरिकी डलर पर्नेछ । अमेरिका, बेलायत, अस्ट्रेलिया, चीन, जर्मनी सहितका केही अरु देशका आउँदो शनिबारदेखि दुवै नयाँ आइफोनको अग्रिम बुकिङ सुरु हुनेछ । यस्तै २५ सेप्टेम्बर अथार्त असोज ८ गतेदेखि उपभोक्ताको हातमा आइफोन पुग्ने छ ।

ठूलो आइप्याड र एप्पल टिभी

एप्पलले यसअघिको भन्दा ठूलो आइप्याड ल्याएको छ । एप्पलले ल्याएको नयाँ आइप्याड प्रोमा १२ दशमलव ९ इचको डिस्प्ले छ । जुन यसअघिका आइप्याड भन्दा ठूलो हो । नयाँ आइप्याड नोभेम्बरमा बजारमा आउने एप्पलले जनाएको छ । यसमा एकपटक चार्ज गरेपछि १० घण्टासम्म चलाउन सकिनेछ । यसको तौल जम्मा सात सय १२ ग्राम मात्रै छ । एप्पल टिभी पनि सार्वजनिक गरेको छ । एप्पल टिभीमा एप स्टोर र अपरेटिङ सिस्टम पनि हुने छ । 

– एजेन्सीको सहयोगमा