आफ्नै नक्कल हेर्दा लालबाबु गदगद..

'अनुहार ठ्याक्कै मिलेको त होइन, मिल्दोजुल्दो छ'

२४ भदौ, काठमाडौं । आफैंमाथि गरिएको हास्यव्यंग्य हेर्दा धेरै नेताहरु भित्रभित्रै मुर्मुरिन्छन् । तर सामान्य प्रशासनमन्त्री लालबाबु पण्डित भने खुशीले गदगद भए ।

हास्यकलाकार मनोज गजुरेलले आफ्नो नक्कल उतारेको हेरेपछि मन्त्री पण्डितले भने, ‘मूलरुपमा उहाँहरुले १०० मा १०० प्रतिशत सन्देश जाने गरिकन त्यो गर्नुभएको रहेछ, म भित्रैदेखि खुशी छु, किनकि मेरो सकारात्मक कामलाई प्रोत्साहन गर्नुभएको छ ।’

प्रज्ञाभवनमा आयोजित गाईजात्रा हेर्न बुधबार दलबलसहित पुगेका थिए मन्त्री पण्डित । उनका साथमा श्रीमती, छोरी तथा सचिवालय र मन्त्रालयका कर्मचारीहरुसमेत थिए । आफ्नो भेषमा साइकल चढेर आएका गजुरेललाई देखेपछि पण्डितले कुर्सीबाट उठेर गजुरेललाई अंकमाल गरे ।

प्रहसनको बीचबीचमा मन्त्री पण्डित मज्जाले हाँस्दै ताली ठोकिरहेका देखिन्थे ।

गजुरेललाई देख्दा तपाईंलाई ऐना हेरेझैं त लागेन ? भन्ने अनलाइनखबरको प्रश्नमा उनले भने, ‘मूलरुपमा भन्नुपर्दा मलाई ऐना हेरेजस्तो लागेन । रुपरंग र आकार त ठ्याक्कै कसले पो मिलाउन सक्छ र । तर, उहाँले धेरै हदसम्म मिलाउने कोशिस चाहिँ गर्नुभएको छ । यसलाई अझै परिष्कृत गर्छु पनि भन्नुभएको छ मसित ।’

मन्त्री पण्डितले आफ्नो आवाज कस्तो छ भन्ने आफैंलाई थाहा नभएकाले आवाज कति मिल्यो, भन्न नसक्ने उल्लेख गरे ।

मनोजले बोलेको कुन डाइलग मनपर्‍यो त भन्ने प्रश्नमा उनले भने, ‘एकछिन पख्नुस है त ।’ एकछिन सोचेर जवाफ दिए, ‘डाइलग त मैले धेरै सम्झेको छैन । तर ‘दूध आउञ्जेल नेपाल आमाको लाम्टो चुसेर दूध आउन छाडेपछि विदेशी मितबाउको घुँडो चुस्ने’ भनेर बोलेको चाहिँ ठीक छ ।’

यो डाइलग त मन्त्रीज्यूले वास्तविकतामै बोल्ने गर्नुहुन्छ नि होइन ?

‘यही आशयको कुरा मैले बोल्ने गरेको छु । ठ्याक्कै यही चाहिँ होइन । मन्त्री भएपछि पदीय मर्यादाअनुसार अलिकति मिलाएर बोल्नुपर्‍यो नि,’ पण्डितले जवाफ दिए । उनले जननी जन्मभूमिश्च स्वर्गादपी गरियसी भन्ने श्लोकलाई मनन गर्दै आफ्नै देशलाई स्वर्ग बनाउनुपर्छ भन्ने धारणा आफूले राख्ने गरेको उल्लेख गरे ।

जीवनकै पहिलो गाईजात्रा

अर्को रोचक त के छ भने मन्त्री पण्डितले यसअघि जीवनमा कहिल्यै गाईजात्रा हेरेका थिएनन् । यसपालि सरकारका अन्य मन्त्री र साथीभाइले ‘तपाईंले नहेरी नहुने छ’ भनेर जोड गरेपछि कलाकारलाई प्रोत्साहन गर्नका लागि हेर्न आएको उनले बताए ।

‘मैले सुरुदेखि अन्त्यसम्म एउटा पनि नछुटाई हेरेँ,’ उनले भने, ‘धेरै रमाइलो हुँदोरहेछ । हँसाउने मात्रै नभएर राम्रो सन्देश पनि दिनुभएको छ सबै कलाकारले ।’

गाईजात्रामा सबैभन्दा मनपरेको प्रस्तुति चाहिँ कुन हो भन्ने प्रश्नमा मन्त्री पण्डित भन्छन्, ‘सबै कलाकारहरुको राम्रो छ । देशको परिस्थितिलाई असाध्यै राम्रो चित्रण गर्नुभएको छ । त्यसमा पनि संघीयताको विषयमा जस्तो प्रस्तुति दिनुभएको छ, त्यो एकदमै राम्रो लाग्यो । प्रदेश भनेको परदेश होइन भन्ने सन्देश दिनुभएको छ ।

मैले पनि यो भन्दै आएको छु कि पहिलो कुरा देश हो, अनि मात्रै प्रदेश । त्यही कुरालाई उहाँहरुले रमाइलो र सबैले बुझ्ने पारामा देखाउनुभएको छ । मूलरुपमा भन्नुपर्दा मलाई मन पर्‍यो ।’

www.onlinekhabar.com