जहाज पन्छाउने काममा ढिलाई हुँदा विमानस्थल खुल्ने अझै अनिश्चित

काठमाडौं, फागुन २३ – त्रिभुवन अन्तर्राष्ट्रिय विमानस्थल सञ्चालन कहिलेदेखि हुन्छ भन्ने झन् अनिश्चित भएको छ । शनिबार बिहान १० बजेसम्म बिमानस्थल बन्द भएको भएपनि त्यसपछि पनि सञ्चालन हुने, नहुने यसै भन्न नसकिने विमानस्थलका अधिकारीहरु बताउँछन् । अवरुद्ध धावनमार्ग खुलाउन बिहीबार भारतबाट ल्याइएको उपकरणसहित भारतको विज्ञ टोलीले निरन्तर काम गरिरहेपनि जहाज पन्छाउन सकिएको छैन ।

घाँसे मैदानमा धस्सिएको विमानलाई माथि उठाएर सुरक्षित स्थानतर्फ लैजान सक्रियतापूर्वक काम गरिरहेको विमानस्थलले जनाएको छ । दुर्घटना भएको विमान धावनमार्गको लम्बाईको बीचमा रहेकाले बाँकी उत्तरतर्फको आधा धावनमार्गबाट हाल आन्तरिक उडानहरू मात्र भइरहेका छन् ।

दुर्घटनाग्रस्त जहाजलाई चारवटा हावा भरिएका बेलुनको सहायताले माथि उठाइएको छ । ती बेलुनलाई सहायता दिन काठको प्रयोग गरिएको छ भने ट्रकको पनि प्रयोग गरिएको छ । जहाजलाई धावनमार्गको तहमा ल्याउन अझै कठिनाइ भएको विमानस्थलले जनाएको छ ।

बुधबार बिहान दुर्घटना भएको जहाजले धावनमार्ग छेक्दा तीन दिनदेखि अन्तर्राष्ट्रिय हवाई उडान ठप्प भएको छ । हजारौं यात्रु विचल्लीमा परेका छन् ।

यसैबीच प्रधानमन्त्री सुशील कोइरालाले उडान अवरुद्ध भई अलपत्र परेका यात्रुलाई अन्तर्राष्ट्रिय नियमअनुसारको सेवा तथा सुुविधा उपलब्ध गराउन संस्कृति, पर्यटन तथा नागरिक उड्डयनमन्त्री दीपकचन्द्र अमात्यलाई निर्देशन दिनुभएको छ ।

तस्बिर : रासस