‘विमान धकेल्ने बेला भयो’

काठमाडौं, फागुन २३ – धावनमार्ग छेकेर बसेको टर्किस एयरलाइन्सको जहाज अब धकेल्ने अवस्थामा पुर्याइएको त्रिभुवन अन्तर्राष्ट्रिय विमानस्थलले जनाएको छ । ‘रातभरको प्रयासले जहाजलाई धावनमार्गको तहमा ल्याइएको छ, अब फलामको पाता राखेर जहाज धकेल्ने काम हुन्छ’ विमानस्थलका प्रबन्धक पूर्ण चुडालले उज्यालो अनलाइनलाई जानकारी दिनुभयो ।

उहाँका अनुसार बिमानका सबै चक्का फेर्ने काम शुक्रबार दिउँसो नै सकिएको थियो । घाँसे मैदानमा बाटो बनाउने र अरु प्राविधिक काम रातभर भएको उहाँले बताउनुभयो । अब सुरक्षित रुपमा विमानलाई पार्किङ गर्ने ठाउँमा धकेलिने विमानस्थलले जनाएको छ ।

तर विमान धकेल्न पनि समय लाग्ने भएकाले धावनमार्ग सञ्चालन कुन बेलादेखि हुन्छ भन्ने यकिन नभएको चुडालले बताउनुभयो । शनिबार बिहान १० बजेसम्म अन्तर्राष्ट्रिय उडान र अवतरण रद्द गरिएको भएपनि १० बजे नै सञ्चालन नहुने पक्का छ ।

अवरुद्ध धावनमार्ग खुलाउन अस्ति भारतबाट ल्याइएको उपकरणसहित विज्ञ टोलीले निरन्तर काम गरिरहेपनि जहाज पन्छाउन सकिएको छैन । दुर्घटनाग्रस्त जहाजलाई चारवटा हावा भरिएका बेलुनको सहायताले माथि उठाइएको छ । ती बेलुनलाई सहायता दिन काठ र ट्रकको पनि प्रयोग गरिएको छ ।

गएको बुधबार बिहान दुर्घटना भएको जहाजले धावनमार्ग छेक्दा तीन दिनदेखि अन्तर्राष्ट्रिय हवाई उडान ठप्प भएको छ । काठमाडौंबाट विदेश जान लागेका र विदेशबाट नेपाल फर्कन खोजेका हजारौं यात्रु विचल्लीमा परेका छन्