नेपाल आउन नपाएर मलेसियामा तीन सय नेपाली अलपत्र

२३ फागुन, क्वालालम्पुर । विदेशमा काम गरेर पैसा कमाउने अनि आफू र परिवारको जीवनमा परिवर्तन ल्याउने सपना देखेर मलेसिया आएका रोल्पा, गैरीगाउँ- ६ का एसपाल घर्तीमगर बुधवार निकै उत्साहित थिए । उनी त्यही साँझ ६ः ३० को फ्लाइटमा स्वदेश फर्केका थिए ।

कतिखेर घर पुगौंला र परिवारसँग दुःखसुख साटौंला भन्ने कौतुहल लिएर एसपाल क्वालालम्पुरस्थित केएलआई टु इन्टरनेशनल एयरपोर्ट पुगे । उनले जब फ्लाइट चार्ट हेरे, एकैचोटी छाँगाबाट खसेझैं भए । राजधानी काठमाडौमा त्यही दिन विहान टर्किस एयरलाइन्सको विमान दुर्घटना भई त्रिभुवन विमानस्थल बन्द हुँदा एसपालको त्यस दिनको फ्लाइट रद्द भएको रहेछ ।

पाकेट खर्च ५० रिंगेटमात्र आफूसित राखेर सबै पैसा नेपाल पठाइसकेका उनी यतिखेर एयरपोर्टमा भोकभोकै फ्लाइट कुरिरहेको नागरिक दैनिकमा खबर छ ।

एसपालका अनुसार एयरपोर्टमा खाना बाहिरभन्दा चार गुण महंगो पर्छ । बेखर्ची भएपछि भोकभोकै नेपालको एकमात्र अन्तर्राष्ट्रिय विमानस्थल कहिले खुल्ला र घर पुगौंला भनेर कुर्नुको विकल्प उनीसँग छैन ।

टर्कीको इस्तानबुलबाट काठमाडौ पुगेको टर्किस एयरको जहाज अवतरण गर्ने क्रममा धावनमार्गबाट चिप्लिएर छेउको चौरमा धस्सिएको थियो । उक्त जहाजलाई अझै ट्रयाकमा तानिसकेको छैन । विमानस्थलबाट आन्तरिक उडान मात्र भरिएको छ । पटक पटक सूचना दिँदै बन्द गरिएको विमानस्थल पछिल्लो पटक शनिवार बिहान १० बजेसम्मका लागि नखुल्ने जनाइएको छ । कहिले खुल्ने हो, त्यो पनि निश्चित छैन । केएलआई टु एयरपोर्टका अनुसार उक्त विमानस्थलमा मात्र ३ सय नेपाली अलपत्र छन् ।

onlinekhabar