उखु किसानहरुले २० दिन भित्रमा पेश्की रकम पाउने, मुल्य निर्धारण भने हुन सकेन ।।

माघ २३–
दुई महिनासम्म बिना पैसा उखु विक्री गरेका किसानहरुले पेश्की रकम पाउने भएका छन् । सरकार, उद्योगी, व्यावासायी र किसानका प्रतिनिधिवीच भएको पछिल्लो बैठकमा २० दिन भित्रमा किसानलाई पेश्की रकम उपलव्ध गराउने निर्णय भएको हो । चिनी मिल संचालनमा आएको दुई महिना वितिसक्दा पनि किसानहरुले अहिलेसम्म पैसा पाएका छैनन भने उखुको मुल्य पनि निर्धारण भएको छैन । तर अब किसानहरुले आफूले विक्री गरेको उखुको प्रति क्विन्टल साढे तीन सय रुपैयाका दरले पेश्की रकम पाउने भएका हुन् । बाँकी मुल्य निर्धारण भएपछि मिलले किसानलाई भुक्तानी दिने गरी सहमति भएको मुल्य निर्धारण सहजीकरण कार्यदलका सदस्य उमेशचन्द्र यादवले जानकारी दिनुभयो । मिल संचालन भएको दुई महिनामा किसानले तीन अर्ब रुपैया बराबरको उखु मिललाई दिएका छन्, त्यसमध्ये साढे एक अर्ब रुपैया किसानले २० दिन भित्रमा पेश्कीको रुपमा पाउने सहमति भएको यादवले बताउनुभयो । सरकारले प्रति क्विन्टल उखुको मुल्य चार सय ५१ रुपैया कायम गर्न प्रस्ताव गरेको थियो भने चिनी मिल संचालकहरुले चार सय चार रुपैया मात्रै दिन सकिने बताएका थिए, । गएको बर्ष चार सय ७६ रुपैया प्रति क्विन्टलमा उखु विक्री गरेका किसानले भने पुरानै मुल्य कायम हुनुपर्ने माग गर्दे आएका छन् । मिल संचालकहरुको अगाडी सरकार पनि लाचार देखिएको र किसानको पक्षमा मुल्य तोक्न नसकेको आरोप उखु किसानहरुले लगाउँदै आएका छन् ।