अवैद्य रुपमा भारत लाँदै गरेका २० वटा गोरु प्रहरी नियन्त्रणमा ।।

माघ १५–
सशस्त्र प्रहरीले भारत तर्फ लान लागेको अवस्थामा सर्लाहीको सीमराबाट २० वटा गोरु नियन्त्रणमा लिएको छ । बोडर आउट पोष्ट सीमराबाट खटिएको गस्ती टोलीले आज बिहान सीमरा गाविस वडा नम्वर ५ बाट अवैद्य रुपमा भारत तर्फ लाँदै गरेका गोरु नियन्त्रणमा लिएको हो । सशस्त्र प्रहरी नायब निरीक्षक विद्याभुषण झाको नेतृत्वमा खटिएको गस्ती टोलीले नियन्त्रणमा लिएको गोरु आवश्यक कारवाहीका लागी जिल्ला भन्सार कार्यालय मलंगवामा बुझाईएको छ । नियन्त्रणमा लिएका २० वटा गोरुको मूल्य ८० हजार बराबर रहेको सशस्त्र प्रहरी निरीक्षक समिप श्रेष्ठले जानकारी दिनुभयो । प्रहरीलाई देख्नासाथ भन्सार छलेर गोरु भारत तर्फ लान खोज्ने तस्करहरु फरार भएका उहाँले बताउनुभयो । पछिल्लो समय सर्लाहीका खुल्ला नाकाहरुबाट प्रहरीको आँखा छली पशुचौपाय समेत भारत तस्करी गर्ने क्रम बढ्दै गएको छ ।