मरभुङमा वडा नागरिक मञ्चमा दलितहरुलाई नराखेपछि विरोध ।।

पौष १३–
गुल्मीको मरभुङ गाविसका दलितहरुले गाविसमा वडा नागरिक मञ्चको गठनमा दलितहरुलाई बाईपास गरेको भन्दै विरोध अभियान थालेका छन् । कांग्रेस, एमाले, एकीकृत माओवादी र अरु साना दलमा रहेका दलितहरुले आफूहरुको अधिकार सुनिश्चि नगरेको भन्दै विरोध सुरु भएको छ । सबै  दलित एक जुट होउँ भन्ने अभियान सहित हिजो मात्रै मरभुङमा भेला भएका दुई सय दलितहरुले कृष्ण सुनुवारको अध्यक्षतामा दलित साझा मञ्चको गठन समेत गरेका छन् । २३ सदस्यीय समितिको उपाध्यक्षमा मुक्तबहादुर विक, सचिवमा कमल नेपाली, सह सचिवमा कमला परियार, कोषाध्यक्षमा भोजबहादुर विक लगायतका सदस्य रहेको सागर गीरीले जानकारी दिनुभयो ।  गठित साझा मञ्चका अध्यक्ष सुनुवारले अव दलिय आस्थाभन्दा बाहिरबाटै अधिकार प्राप्त गर्ने अभियान सुरु भएको बताउनुभयो । गाविसमा दलितहरुको मात्रै बहुमत पुग्ने भएकोले गाविसका सम्पूर्ण तह र तप्कामा सबै दलहरुबाट बाहिर निस्किएर स्वतन्त्र रुपमा चुनाव लड्ने समेत चेतावनी दिनुभयो । तर दलितहरुलाई अपनत्व महसुस हुने गरि दलहरु आएमा आफ्ना आस्थाका दललाई फेरी समर्थन गर्ने पनि बताउनुभयो ।