भारतका प्रधानमन्त्री मोदीले बिभिन्न राजनितिक दलहरुसँग भेट्ने

श्रावण १९ काठमाण्डौ
भारतीय प्रधानमन्त्री नरेन्द्र मोदी दुई दिने नेपाल भ्रमण पूरा गरी सोमबार स्वदेश फर्किंदै हुनुहुन्छ ।
स्वदेश फर्कनुअघि उहाँले महत्वपूर्ण राजनीतिक भेटवार्ता गर्ने कार्यक्रम छ । विहान पशुपतिको विशेष पूजा गरेपछि सवा ११ बजे राष्ट्रपति डा। रामवरण यादवसँग मोदीले शितल निवासमा भेट गर्नुहुनेछ । त्यसपछि राष्ट्रपति यादवले मोदीको सम्मानमा दिवा भोज दिने कार्यक्रम छ । दिउँसो १ बजेपछि मोदीले होटल हायातमा राजनीतिक दलका शीर्ष नेताहरुसँग भेटवार्ता गर्नुहुनेछ ।  मोदीले नेकपा एमालेका अध्यक्ष केपी शर्मा ओली, एकीकृत माओवादीका अध्यक्ष पुष्पकमल दाहाल प्रचण्ड र मधेसी नेताहरुसँग भेटवार्ता गर्ने कार्यक्रम तय भएको छ । दिउँसो ३ बजे उहाँले व्यापारीहरुलाई सम्बोधन गर्नुहुनेछ । मोदीले पाटन दरबार स्क्वायरको भ्रमण गर्ने भनिएपनि यसको टुंगो लागिसकेको छैन । उहाँ बेलुकी स्वदेश फर्किने कार्यक्रम छ । आइतबार विहान काठमाडौ आइपुग्नुभएको मोदीले प्रधानमन्त्री सुशील कोइरालासँग आइतबार नै भेटवार्ता गर्नुभएको छ । मोदीले व्यवस्थापिका संसद वैठकलाई पनि सम्बोधन गर्नुभएको थियो ।
त्यस्तै
भारतीय प्रधानमन्त्री नरेन्द्र मोदीले भारत र नेपालबीचको टेलिफोन शुल्क महँगो रहेकाले यसलाई घटाएर सुलभ बनाउनुपर्ने बताएका छन् ।
दुई दिने नेपाल भ्रमणमा आएका मोदीले आइतबार संविधानसभामा सम्बोधन गर्दै टेलिफोन शुलक महँगो भएकै कारण भारतमा रहेका नेपालीले फोन गरेर नमस्तेमात्र भन्नुपर्ने बाध्यता रहेको बताए । ‘अमेरिका फोन गर्दा सस्तो हुन्छ तर नेपाल गर्दा महँगो पर्छ । किन यस्तो भइरहेको छ रु’ शुल्क घटाउन दुवै देशका सेवा प्रदायकहरुले पहल गर्नुपर्ने सुझाउँदै मोदीले प्रश्न गरेको नागरिक दैनिकमा खबर छ ।
‘लाखौ नेपाली भारतमा छन् । उनीहरु परिवारसँग कुरा गर्न चाहन्छन् तर नमस्ते गरेर फोन राख्छन्,’ उनले भने, ‘यस विषयमा दुवै देशका सेवा प्रदायकसँग कुरा गर्नुपर्छ । म पनि कुरा गर्छु तपाई पनि गर्नुस् । यो कनेक्टिभिटी यस्तो हुनुहुँदैन ।’
विविध विषयमा सम्बोधन गरेका मोदीले आफ्नो मन्तव्यमा टेलिफोन शुल्क सस्तो हुनुपर्ने र सहज रुपमा कुराकानी हुनुपर्नेमा जोड दिएका थिए ।
यसैबिच भारतीय प्रधानमन्त्री नरेन्द्र मोदी आवतजावत गर्दा पर्ने सडक र त्यस आसपासमा सोमबार पनि सुरक्षा व्यवस्था कडा बनाइएको छ ।
होटल हायातबाट विहान सवा ९ बजे पशुपतिनाथको दर्शनका लागि जाने कार्यक्रम भएकाले त्यस समयमा चावहिल, गौशाला, मित्रपार्क, जयबागेश्वरी र बौद्धतर्फ जाने आउने गाडीलाइ रोक लगाइएको छ ।
तर पशुपतिबाट विहान सभा १० बजे मात्र फर्कने भएकाले १ घण्टाको बीच समयमा भने यात्रु ओहोरदोहोर गर्न सक्ने महानगरीय ट्राफिक प्रहरी महाशाखाले जनाएको छ । भारतीय प्रधानमन्त्री पशुपतिमा पूजा सकेर सवा १० बजे हायात होटलमै फर्कने कार्यक्रम छ ।
यस्तै होटलबाट बिहान ११ बजे शितल निवास जाने कार्यक्रम भएकाले यो समयमा बौद्ध, चावहिल, गोपीकृष्णहल, सुकेधारा, धुम्बाराही, नारायणगोपालचोकमा यातायात अवरुद्ध हुने ट्राफिक प्रहरीले जनाएको छ ।
मोदी दिउँसो १ बजे शितल निवासबाट होटल हायात फर्कनुहुनेछ । ११ बजेदेखि १ बजेको बीचमा यस रुटको सडकमा गाडी चलाउन पाइने ट्राफिक प्रहरीले जनाएको छ । यस्तै बेलुकी ४ बजे  मोदी होटल हायातबाट एयरपोर्ट जाने कार्यक्रम रहेकाले त्यस रुटमा त्यतिबेला गाडी चलाउन रोक लगाइएको छ ।