मन्दिर तामाले छाउन थालियो ।।

१७ असोज, बाग्लुङ ।।
पञ्चवर्षिय योजना सहित धार्मिक पर्यटनको गन्तव्य बनाउने तयारी स्वरुप बागलुङ कालिका भगवती मन्दिरलाई तामाले छाउने काम थालिएको छ । मन्दिर व्यवस्थापन समितिको अगुवाइमा छाना छाउने तयारी गरेपछि गुठी संस्थानले कुल लागतको ५० प्रतिशत सहयोग गरेको समितिका अध्यक्ष राजु खड्काले बताए । बडादशै अघिनै सक्ने गरी समितिले कुमार खड्काको संयोजकत्वमा ५ सदस्यीय निर्माण समिति बनाएर काम थालेको हो । मन्दिरको गजुर भएको उपल्लो छाना शनिवार सम्म छाइसकिएको छ ।
डिभिजन कार्यालय बागलुङका इन्जिनियर शेखरचन्द्र केसी सहितका प्राविधिकले तयार गरेको ५२ लाख लागतको स्टिमेटमा संस्थानको २३ लाख, बुटवल निवासी रामबहादुर शाक्यको करिब ७ लाख र बाँकी रकम समितिले व्यहोर्नेगरी निर्माण थालिएको हो । ढुंगाले छाएको छानाबाट केही समययता मुर्तिमा पानी चुहिन थालेपछि समितिले गुठीसंस्थान पुगेर सहयोगको माग गरेको थियो । तामाको छाना सहित ५१ सूचक पुरा गरेर मन्दिरलाइ विश्व सम्पदा सूचिमा सूचिकृत समितिले पञ्चबर्षे योजना बनाएको छ । योजना अनुसार मन्दिर प्रवेशको झण्डै एक किमी सडक ढलान गरिसकिएको छ । त्यसमाथी पुरातात्विक क्षेत्रको जस्तै ढुंगा छाप्ने खड्काले बताए । मन्दिरमा सरसफाइ, पूजा र बली व्यवस्थापन तथा प्रवेशद्वार निर्माण भैसकेको छ । तामाको छाना कम्तिमा ५ सय बर्ष खप्ने जानकारहरु बताउँछन् ।
‘आधा सूचक पुरा गरिसकेका छौं भने केहीमा स्थानीय व्यवसायी र समाजसेवीले पनि सहयोग गरेका छन्’ खड्काले भने, ‘मुस्ताङ पुग्ने सबै भारतीयलाई भित्राउन सकेमा देशकै प्रमुख गन्तव्य बन्न सक्छ ।’ हरेक दिन सयौं भक्तजन आउने कालिका मन्दिरमा चैतेदशै र बडादशैमा झण्डै ६ लाखको संख्या पुग्ने गरेको छ । गुठी संस्थानका अध्यक्ष तथा प्रशासक पञ्चलाल महर्जन स्थलगत रुपमा भ्रमण गरेर मन्दिरको वास्तविकता हेरेपछि रकम विनियोजन गरेको बताए । ‘छाना छाउने योजनाको झण्डै आधा रकम सहयोग गरेका छौं’ महर्जनले भने,‘प्रसिद्ध धार्मिक गन्तव्य भएको बुझिएकोले क्रमागत रुपमा सुधारका योजना ल्याउँछौं ।’ समितिले उल्लेख्य काम गरेकोले आवस्यक पुरै दिन नसकेपनि सक्दो सहयोग गर्ने योजना रहेको उनले बताए ।
बागलुङकै अमलाचौरमा रहेको प्रसिद्ध भैरवस्थानको गुरुयोजना सफल बनाउन पनि १० लाख रुपैयाँ संस्थानले व्यहोरेको छ ।