नेकपा–माओवादी छोडेको असन्तुष्ट चन्द समूहको घोषणा ।।

मङ्सिर ०८
सचिव नेत्रविक्रम चन्द नेतृत्वको असन्तुष्ट समूहले अध्यक्ष मोहन वैद्य लगायत संस्थापन पक्षसँग अलग भएको घोषणा गरेको छ । अध्यक्ष वैद्यलाई असन्तुष्टि सहितको पत्र बुझाएर चन्द पक्षले औपचारिक रुपमा पार्टीबाट अलग भएको घोषणा गरेको हो । नेवा राज्य समितिको कार्यालय कुपन्डोलमा जारी केन्द्रीय समितिको आजको बैठकमा आफूहरुले औपचारिक पत्र बुझाएपछि दिउँसो एक साथ बाहिरिएको असन्तुष्ट समूहका एक नेताले जानकारी दिए ।  अध्यक्ष वैद्यलाई बुझाएको तीन बुँदे पत्रमा क्रान्तिकारी लाइनलाई हेर्ने दृष्टिकोणमा नै फरक परेपछि आजैका मितिदेखि सम्बन्ध विच्छेद गरेको उल्लेख छ । पछिल्लो समय जारी विवाद मिलाउनेभन्दा पनि केन्द्रीय समितिको पूर्ण बैठकमा अध्यक्ष वैद्यले बिचार नमिल्नेहरु पार्टी छोडेर जानसक्ने आशयसहितको प्रतिवेदन पेस गरेर सहमतिको वातावरण झन बिगारेको चन्द पक्षले आरोप लगाएको छ । कुपन्डोलबाट बाहिरिएका असन्तुष्ट नेताहरुको छुट्टै बैठक चावहिलस्थिति चन्दको घरमा बसिरहेको छ ।