प्रहरी हिरासतमा मृत्यु हुने बिकको अझै शव उठ्न सकेन

प्रेम सुनार, गुल्मी
फाल्गुण १९–
परिवारजनलाई जानकारी नदिई एक घटनाको अनुसन्धानका लागि भन्दै पक्राउ गरेर जिल्ला प्रहरी कार्यालय गुल्मीको हिरासतमा राखिएका एक व्याक्ती रहस्यमय मृत्यु भएको आज चार दिन सिम्म पनि शव उठ्न सकेको छैन् । गुल्मीको रेसुङ्गा नगरपालिका वडा नम्वर–८ भुजेलखर्कका ३९ वर्षिय रामबहादुर बिश्वकर्मा फागुन १६ गते साँझ करिव ६ वजे र ८ मिनेटको समयमा प्रहरी हिरासतमा राखेको समयमा शौचालयमा जान्छु भन्दै भित्र पसेर झुण्डीएर आत्मा हत्या गरेको प्रहरीको भनाई छ ।
तर परिवारजनले प्रहरीको उक्त भनाई स्वीकार गर्न सकेका छैन् । उनका परिवारजनले आफुहरुलाई जानकारी नै नदिई पक्राउ गरेर कुटपिट यातना दिई मारेको हुन सक्ने आसंका गरेका छन् । उनकी श्रीमति ३५ वर्षिया रिमा बिश्वकर्मा र परिवारका अन्य सदस्यहरुले निष्पक्ष छानविन र दोषी माथी कार्वाही गरिने प्रत्याभुति नभए सम्म शव नउठाउने अडान लिए पछि ढिलाई भएको हो ।
तम्घासमा रहेको एक मस्जीद तोडफोड गरेको आशंकामा उनलाई पक्राउ गरी अनुसन्धान भई रहेको वेला हिरासत कस्टडी संगै रहेको शौचालय भित्र गई उनले चुङ्गीको पासो लगाई आत्मा हत्या गरेको निमित्त जिल्ला प्रहरी प्रमुख प्रहरी निरीक्षक अम्विकाप्रसाद गुप्ताले बताए पनि परिवारजनले पत्याउन सकेका छैनन् । प्रहरी निरीक्षक गुप्ताले सुरुमा पाईन्टको पासो लगाई झुण्डीएको र पछि चुङ्गीको पासो भनेको भन्दै परिवारजन थप आक्रोषित भएका छन् ।
झुण्डीएको भनिने शौचालयको माथील्लो स्थानमा डोरी लगाउनै सम्भव नभएको प्रत्यक्षदर्शी बताउ छन् । हिरासतमा लिनु पुर्व जिल्ला अस्पताल तम्घासमा डाक्टरले उच्च रक्तचापको विमारी भएकोले दुई घण्टा पछि अस्पताल ल्यान लगाए पनि प्रहरीले नलगेको समेत बताईएको छ । प्रहरीको सुरक्षा घेरा भित्रै भएको रहस्यमय मृत्युको सम्वन्धीत निकाय गम्भीर भएर छानविनमा लाग्नु पर्ने सर्वत्र आवाज उठेको छ ।
आज विहान जिल्ला प्रशासन कार्यालयमा निमित्त प्रमुख जिल्ला अधिकारी वलराम अर्यालको अध्यक्षतामा वसेको राजनैतिक दलका प्रतिनीधी, पत्रकार , नागरिक समाज, मानवअधिकारवादी र पिडित पक्ष विचको छलफल कार्यक्रममा मृतकका परिवारजनको माग सम्वोधन गर्ने लिखित सहमति पश्चात शव वुझ्ने बुझाउने निर्णय भएको थियो ।
उक्त निर्णय भए पनि जिल्ला अस्पतालमा पोष्टमार्टम गर्ने डाक्टर अभाव भएका कारण शव आज पनि उठ्न नसकेको हो । एक जना डाक्टरले सरकारी नियुक्ति नै नपाएको र अर्का एक जना डाक्टर डेन्डल विशेषज्ञ भएकोले अन्य जिल्लाबाट सरकारी मान्यता प्राप्त डाक्टर मगाईएको र साँझ सम्म आई पुग्ने प्रहरी निरीक्षक गुप्ताले जानकारी दिए ।
मृतक बिश्वकर्माका परिवारजनलाई प्रहरी र जिल्ला प्रशासनले कृया खर्च स्वरुप ३० हजार नगद दिने, मृतककी श्रीमतिलाई रोजगार दिलाउने , उनिहरु सुकुम्वासी भएका कारण सुकुम्वासी आयोगमा जमिन दिलाउनका लागि पहल गर्ने र उक्त रहस्मय भनिएको बिश्वकर्माको मृत्यु घटनाको छानविन समिति गठन गर्ने सहमतिमा शव उठाउन परिवारजन मञ्जुर भएका हुन् । सहयाक प्रमुख जिल्ला अधिकारी संयोजक रहने गरी राजनैतिक दलका प्रतिनिधी, मानव अधिकारवादी, पत्रकार र नागरिक समाजका प्रतिनिधी रहने गरी उक्त घटनाको छानविन समिति गठन भएको छ ।
समितिमा नेपाली कांग्रेसको तर्फबाट उपसभापति भुवन प्रसाद श्रेष्ठ, नेकपा एमालेको तर्फबाट सचिवालय सदस्य जंग नेपाली, एकिकृत नेकपा माओवादीको तर्फबाट सचिवालय सदस्य अशोक थापा, नेकपा–माओवादीको तर्फबाट अध्यक्ष विरबहादुर कार्की , राप्रपाबाट अध्यक्ष भरतबहादुर चन्द, पत्रकारहरुको तर्फबाट घनश्याम गौतम र प्रेम सुनार , मानव अधिकारवादीको तर्फबाट हरिप्रसाद पोखरेल, नागरिक समाजका तर्फबाट पदम पाण्डे , दलित प्रतिनिधीका रुपमा धर्म बिश्वकर्मा र पिडित पक्षबाट कृष्ण बिश्वकर्मा सहित १५ सदस्यीय छानविन समिति गठन भएको छ ।
समितिले एक हप्ता भित्रमा प्रारिम्भक प्रतिवेदन सार्वजानिक गर्ने प्रतिवद्धता निमित्त प्रमुख जिल्ला अधिकारी वलराम अर्यालले जनाएका छन् । उनले उक्त घटना प्रति प्रशासन गम्भीर भएको भन्दै निष्पक्ष छानविन हुने बताएका छन् । प्रहरीको सुरक्षा घेरा भित्रै अनुसन्धानमा रहेका नागरिकको रहस्यमय मृत्यु हुनुले यहाँको सुरुक्षा व्यवस्थामा गम्भीर प्रश्न चिन्ह खडा भएको सरोकारवालले प्रतिकृया दिएका छन् । यस प्रति गुल्मी जिल्ला प्रहरी वृत्तमा गम्भीर समिक्षा हुनु पर्ने यहाँका पत्रकारहरुको समेत जोड दिएका छन् ।