पोखरामा बाख्रो खान आएको चितुवाले ओच्छ्यानमै पसेर आमाछोरीलाई टोक्यो

फाल्गुण १४–
पोखरामा बाख्रा खान खोरमा पसेको चितुवा धपाउन खोज्दा लेखनाथको खोलाबेसीमा आमा छोरी गम्भीर घाइते भएका छन् । बुधवार राति घरैमा आएर बाख्रो खान खोरमा पसेको चितुवाले टोकेर ७० वर्षीया जमुना बराल र ५० वर्षीया रमा सुवेदीलाई गम्भर घाइते भएका हुन् ।
दुवैको अनुहार, टाउको र शरीरका विभिन्न भागमा चितुवाको पन्जा र दाँतले टोकेर घाउ बनाएको छ । आमाछोरीलाई चितुवाले झम्टेपछि गाउँलेले तत्काल पश्चिमाञ्चल क्षेत्रीय अस्पताल पोखरामा लगेका थिए ।
त्यहाँ उपचार हुन नसकेपछि गण्डकी मेडिकल कलेज र त्यहाँबाट पनि मणिपाल शिक्षण अस्पताल पोखरामा लगिएको थियो । ‘बाख्राको खोरमा खैलाबैला मच्चिएपछि के भएछ भनेर बत्ती बालेर हेर्दा चितुवा पो रैछ,’ घाईते रमाले भनिन्, ‘गुहार भन्न नपाउँदै झम्टिएर घोक्रो समाउन आईपुग्यो ।’
उपचार भइरहेकाले दुवै खतरामुक्त छन । जमुना छोरीको घर पुगेकी थिइन् । एक बर्ष देखि बाख्रा फर्म संचालन गर्दै आएकी सुवेदीको घर र खोर एकै ठाउँमा छ । चितुवा खोरको ढोका थुनिएपछि मान्छे सुतेको कोठामा पसेर आमा र हजुरआमालाई झम्टेको शंकर सुवेदीले बताए ।
सुवेदीले व्यावसायिक रुपमा ५० बढी बाख्रा पालेका छन् । चितुवाले दुईवटा बाख्रा पनि मारेको थियो । थुनिएको चितुवा बाहिरवाट ढोका खोलेपछि भागेको थियो ।